Heilbrigði er ekki mælt í kílóafjölda

Ég held að það veiti ekkert af að minna á að heilbrigður líkami er ekki mældur í kílóum. Þeir sem eru yfir kjörþyngd geta vel verið í miklu betra formi en þeir sem eru í kjörþyngd og formið hefur meiri áhrif á heilsuna en kílóafjöldinn. En hvort sem þú ert í góðu eða slæmu formi, í kjörþyngd, undirþyngd eða yfirþyngd:

1. Hugsaðu og talaðu fallega um líkamann þinn og lærðu að meta það að líkaminn er kraftaverk. Það er sérstaklega mikilvægt að foreldrar tali ekki illa um líkamann sinn og holdafar í viðurvisst barna sinna. 

2. Gerðu það upp við þig hvað heilbrigði og hreysti þýðir í þínum huga. Það að vera sáttur við líkama sinn í hvaða formi sem hann er þýðir ekki að okkur sé sama um heilsuna, þvert á móti! Góð heilsa samanstendur af mörgum ólíkum þáttum andlegum og líkamlegum og þyngdin er bara smá brot af því. 

3. Láttu aðra vita að þú stundir hreyfinu vegna þess að þér þykir vænt um líkama þinn og heilsu en ekki vegna þess að þú þurfir umfram allt að léttast. Stundaðu hreyfingu af því að hún eykur vellíðan, er skemmtileg, dregur úr kvíða og streitu og minnkar líkur á ýmsum sjúkdómum.

Eintóm skynsemi

Þeir sem þekkja mig vita að ég er mjög jarðbundin manneskja. Ég er vísindalega þenkjandi, vil að hluturnir séu skoðaðir af skynsemi og vil alltaf leita rökréttra skýringa.

Ég hef aldrei farið til spákonu og ég er ekki í þjóðkirkjunni. Það hefur vafalaust komið mörgum á óvart þegar ég fór að stunda jóga á fullu og fljótlega upp úr því að læra að verða jógakennari, þar sem jóga hefur í huga margra yfir sér dularfullan blæ. 

Jóga á uppruna sinn á Indlandi og á sér mjög langa sögu. Það hefur þróast samhliða indveskri menningu frá því löngu fyrir Krist. Jógað á sér heimspekilegar og trúarlegar rætur en í mínum huga er jóga jarðbundið, rökvisst og ótrúlega skynsamlegt. Það sameinar andlega og líkamlega þáttinn og tengir okkur við okkur sjálf. Hvað getur hugsanlega verið gáfulegra en það? 

Ég hef mikla trú á öllum mögulegum íþróttum og líkamsrækt og veit að það gerir fólki gott. Jóga hefur þó nokkra sérstöðu vegna þeirrar áherslu sem það leggur á að vera meðvitaður í allri hreyfingu og öndun. Hvernig það að iðka jóga hjálpar okkur við að kynnast sjálfum okkur, átta okkur á okkar veikleikum og styrkleikum og að öðlast sjálfsstjórn. Iðkunin snýst ekki um samkeppni og framfarir felast ekki í að geta teygt sig lengra eða ná að komast í erfiðar stöður. Framfarirnar felast miklu fremur í að ná auknum aga, að kyrra hugann, ná stjórn á öndun og þar með hreyfingum og líðan og að ná að leita betur inn á við. Og hvernig á eiginlega að keppa í því?

Sem sagt eintóm skynsemi!

Namastei